Love your LIFE

偶然同朋友 chat，

忽然佢就開門見山咁嚟同我分享近日嘅心情。

一位多年好友近日離世，

還未到四十，

已經行完咗佢嘅一生。

面對住咁嘅情況，

我，

真係唔太識得點去安慰佢，

於是，我都同佢分享咗我嘅睇法。

近年，

我比以前更加唔計較，

唔係變大方咗，

而係明白到，

今日可以見到對方會行會走，

並唔代表聽日仍然會健健康康。

生活上有乜嘢真係咁值得去嬲一個人呢？

其實真係冇乜嘢。

而家嘅我真係會身體力行咁去愛，

同埋好好咁去珍惜身邊嘅所有嘢。

今日可以健康同你講聲 “我愛你”，

但我並唔可以保証聽日係咪仍然健在。

“閻王要你三更死，不許留人到五更”

我可以做到嘅只係今日我會對你，你和你說聲我愛你。

希望你哋都可以接收到我嘅訊息。

或者好多人覺得咁諗好悲觀，

但，這的確係事實，

現實永遠都係有好多無奈。

我想好好咁把握住每一日，

做好應該做嘅事。

不過要做嘅嘢真係有太多太多，

希望上天可以畀多尐時間我。

經常同人講要“珍惜” ，

好多時候都好懷疑，

到底有幾多人真係會明呢？

我仍然會堅持同長氣地提醒自己，

因為我哋都係好易唔記得。

唔理發生乜嘢事都好，

最緊要係個人冇事，

其它嘅嘢真係唔再重要。

生命嘅可貴全因為只此一次，

真係冇 take 2 嘅。

多尐去欣賞我哋擁有緊嘅嘢，

因為這一切都唔係必然。